馬時亨元旦上任港鐵主席，凌晨就已馬不停蹄搭東涌綫去咗青衣嘅車務控制中心巡視，話要祝乘客同港鐵員工新年快樂，都可謂相當勤力，其實今年都有唔少艱巨任務等緊馬主席表演，最重要就係為高鐵埋尾，八方知佢明白呢單嘢好惡啃，所以去年仲係候任主席時已開始做嘢，帶埋成班港鐵高層四圍見議員、見傳媒，擺好個陣打硬仗，但連佢都話，要立會過高鐵撥款有難度。
港鐵建議嘅工程費封頂同派發特別股息方案，雖然俾分析員、股評人狂插，但港鐵股價竟然無跌。馬時亨就好有信心，話按股價走勢，下個月股東特別會，小股東會支持方案，對於街外人話派特別股息呢條橋係佢諗出嚟，馬時亨好謙話係集體創作。
稱高鐵攞唔到錢或停工
不過一講到向立法會申請高鐵追加撥款，連佢都承認係非常有難度嘅挑戰，泛民議員講明會拉布，馬時亨仲講到明3月死線都未攞到錢嘅話，高鐵工程可能會全面停工。
除咗高鐵追加撥款呢單嘢惡啃，社會對港鐵年年加價都好有意見，馬時亨話佢有聽到社會嘅聲音，港鐵內部研究緊係咪可以提早檢討票價可加可減機制，但係董事局仲未討論，亦唔想定時間表。「唔想畀大家一個錯誤嘅期望，票價收入係港鐵重要收入來源。」佢話港鐵一年花60億維修，如果唔賺錢，就無法維修鐵路。
李八方
mailto:[email protected]