一班留港過新年嘅泛民中人，選擇喺香港山頭「行大運」。當中和平佔中召集人戴耀廷，噚日參加元旦遊行前，就同陳健民、公民黨陳淑莊、港大教授陳祖為等人（上圖），由西貢北潭涌行到去萬宜水庫東壩。陳健民話，好開心新一年以行山開始，話戴耀廷嚟緊要迎接審訊同大學秋後算賬、陳祖為要喺港大校委會與李國章困獸鬥、陳淑莊則計劃重返議會同建制派周旋，都要有健康身心去應付呢班「無恥當無敵之輩」。
一班政壇後生仔噚日亦不甘示弱，民陣前召集人陳倩瑩就同工黨前副主席鄭司律等人（下圖），凌晨唔怕凍登上獅子山，迎接2016年第一個日出，更喺山上手持「我要真普選」標語影相，睇嚟大家新一年都龍精虎猛喎。