今年元旦日雙料娛樂，分別編跑兩項本地三級賽洋紫荊短途錦標及華商會挑戰盃。
其中第八場1000米直路三級賽洋紫荊短途錦，比上屆提早了三個幾月上演，結果由摩廐次熱3.5倍之「新力風」夥拍潘頓後上勝出，此駒收復上屆跑第三之失，馬主黃良柏捧盃慶祝60大壽，練馬師大摩繼日前憑「人民武士」捧走新馬錦標後，自製一口跨年盃賽孖寶，盃王本色重現！
今場對大摩同潘頓呢對澳洲鄉里別具意義，事關「新力風」帶畀佢哋破冰重新合作後首場頭馬，。自2013年12月攜手贏香港瓶「多名利」以來，兩人相隔逾兩年再度合作贏馬。組合獨贏「勝出練馬師」開出B1約翰摩亞派28.5元，組合獨贏3揀1則開出A1，派18.5元。
今場話就話係大賽，不過出馬卻唔多，大熱門「龍城勇將」末段居然受困，好遲至望空之下，後上僅僅追過冷門「誰可拼」，卻輸畀「新力風」屈居亞軍，而「誰可拼」跑開1200及1400米，縮程以冷門身份跑第三，表現算有交代。
韋達與賀廐「兵威振」聯手求衛冕，跑來卻虎頭蛇尾，拉士力弱任過唔嬲跑梗頸四，四重彩派六千五百幾。