賭王四房兩名公子日前齊爆戀事，猷亨戀上「新一代宅男女神」陳瀅，而孻仔猷君就與西甲華倫西亞班主、新加坡富商林榮福千金Kimmy Lim撻着。記者昨日聯絡了身在悉尼過元旦的猷君，問到他之前曾表示「戀書不戀人」，他笑笑口：「𠵱家放緊假，我考完final，緣份遇到就會開始。」問到覺得Kimmy是否他的理想女友？他即大讚：「唔止我，佢obviously係好多男仔夢寐以求鍾意嘅女仔，佢好sweet、nice。」
甜認發展中
之前有傳二人傾波經撻着，猷君搞笑表示：「唔知點解咁傳，個個朋友都知我睇英超，曼聯fans。」對於二人各自陪家人度元旦，他表示：「有冇朋友、女朋友，大家都要將元旦陪屋企人，總之發展緊，畀啲空間我哋。」
此外，超盈透露與Kimmy認識多年，大讚對方屬好女仔，不過否認做了紅娘，她表示：「我都唔知，阿君返嚟放假，日日黐住我，等我收工，去邊帶埋佢，係因我識咗Kimmy，佢哋啱啱開始發展吓，唔好嚇走佢哋。」四太一家戀事連連，闔家除夕晚齊齊睇煙花倒數，昨日超盈更穿上火紅比堅尼騷腿，同猷君齊齊落水。
採訪：唐如