今日係2016年1月1日，大日子也。香港回歸中國之後，日子好似過得特別快，眨吓眼已係第十九年，左丁山與同學同輩講嘢傾偈，開口埋口就係廿幾卅年前，幾得人驚。細路哥時睇粵語武俠片，忠奸角色俾人打死，總會有臨終一句：「18年後一條好漢」，嗰陣覺得18年係好遙遠之事，現在諗一吓九七，已經係十九年前嘞。
一月一日係戊子月壬午日，因子午相沖，故此今日係月破日，不甚吉利，但現代人唔理得咁多嘅嘞，照樣慶祝新年、食大餐，去馬場（今日月破，難道會係爆冷連場？）。肥仔K與妻女去咗東京過聖誕與新年，佢話日本人信耶穌教者少，對聖誕求求其其，不放假，但自從日本脫亞入歐，廢除陰曆之後，視一月一日為頭等大節日，今個禮拜各大公司忙於搞同事之間嘅「忘年會」，吃個不停，今日就會去各神宮寺廟參拜，肥仔K話都會帶住個歲半bb到明治神宮感受氣氛喎，咁細個就去明治神宮，容乜易變日本妹？應該在丙申猴年年初一去一去黃大仙或新年拜車公廟先至係路。
一月一日破日，中貿林前幾日吃飯時講：「唔駛驚，破而後立，不破不立，咁先至可以推陳出新！」點知追數王加多一句：「有先可以破，無則破亦無用。實在啲從歷史講，破者，破有錢人、破建制也、即係無產破有產，無產階級喜歡破，橫掂拚死無大害。有產階級喜歡不會變、不動搖、不變形、不走樣。」嘩，直情係習主席之言噃，啲本土激進派要破基本法，梁特首就要緊緊守着習主席之四個不變，唔怪得佢對本土派冇乜好感。財務L就話：「有錢人係會破財㗎，2016年可能有爆破！」咁得人驚？財務L話：「我在12月27日到馬場，見到幾位有錢廠家，其中一位話2015年買落不少人民幣，仍未沽得晒，睇落2016年一定蝕本破財收場。佢話自己已經輸得少，因為佢間往來銀行有良心，佢用孖展炒人民幣，去到二千萬，已經俾銀行叫停，不再借錢，當時佢好唔爽，現在就慶幸買得少，輸得少，讚番銀行有良心。廠家有唔少行家在某銀行買人民幣accumulator，因銀行不斷推介，買咗好多好多，假如人民幣再跌，班行家會輸得好甘呀，故此話2016年好可能有人輸到爆破、破財還算事小，破產就認真悲痛。」