34歲嘅香港奧運山地車代表陳振興，前日一索得男榮升爸爸，佢同前體育主播梁倩影喺2014年五月結婚，兩人嘅愛情結晶重7.37磅，母子平安。廿四孝女婿尊重外母意見，將BB仔嘅出世消息推遲一日、等到除夕先公佈。雖然BB比預期遲咗幾日出世，但趕得切做2015 BB，上年香港體壇超級旺丁，單車嘅黃金寶、桌球嘅傅家俊、馮國威、壁球嘅李浩賢全部做咗爸爸，加埋「小山地興」，2015體壇認真熱鬧。