愛睇戲,但鑒賞力不足,作別2015,膽粗粗選今年在港上映的電影之最,有讚有彈,沒有中肯保證,專業精神欠奉,個人無乜優點,勝在老實。我首先頒個最穩陣頭盔大獎畀自己,多謝晒《果籽》。
最搶鏡綠葉:《玩轉腦朋友》Bing Bong
我知我知我知阿愁變了大家的最愛,但要數最佳綠葉演員,必數主角兒時幻想好友 Bing Bong,它長大了便給遺忘,最後甘寧願犧牲,消失一刻,我頓覺心肺被夭,會痛o既喂大佬。
我好似睇住我嘅青春一去不返咁,嗚呀。
最走漏眼青春片:《初戀有病》(Me, Earl and the dying girl)
回首90年代的電影,今年寧舍多,尤其華語片,《王家欣》老實說乏善足陳,但導演劉偉恆對電影的熱誠可嘉,處男下海,可以原諒;《那一天我們會飛》談夢想,手法略嫌老土,感動位多,但碎上,不深刻。兩個中學生人到中年的後段更有點超現實;《我的少女時代》有精密的商業計算,要人又喊又笑,結局卻美好得過份。還是比較喜歡《初戀有病》,電影宅男「被逼」與癌症女孩相處,無溫暖到熱的關愛,只是一直陪伴,無聊事認真做,中學雞青春味應該係咁樣樣。幽默可愛怪雞又真實,最後令人哭到妝都甩埋,真正高手。電影11月上時無乜人知,來去匆匆。最走漏眼,實至名歸,好似係。
最失望改編劇本:《進撃的巨人》
漫畫、動畫,有萬千粉絲為它捱更抵夜,電影拍成一副怪相,成何體統。電影設定改了,添加了愛情元素,已傷盡粉絲心。片中男女對話如同AV橋段,個個演員無厘神氣。情節kai有時,瘋有時,總之難捱,萬分失望。
最sad對白:《Stand By Me:多啦A夢3D》我真係要走喇~
我們永遠的叮噹,配音員林保全走了,沒看到電影上映。那時人人都為電影中多啦A夢對大雄說的一句:「我唔可以再留喺度,我真係要走喇~」而喊到死了,戲裏戲外都咁sad。叮噹老了,伴大家長高後,就要功成身退。
最痴線電影:《低俗殭屍玩出征》What We Do in the Shadows
無定向過癮,一屋幾隻吸血鬼,好多現實生活煩惱:洗碗、爛牙、當代fashion、錯咬大動脈搞到一地血要清理,痴線地好笑,我有朋友真係笑到痴咗線。抵死玩盡吸血鬼特徵,配音版加入大量香港地道粗口,另類親切,奇葩電影,絕對推介。
記者:葉青霞