上一代嘅香港小姐，形像高貴典雅，但其實優雅嘅港姐，一樣可以好麻甩，仲會大魚大肉擦餐勁！
今屆區議會選舉中，喺南區香港仔當選區議員嘅前港姐、有「哈佛小甜甜」之稱嘅任葆琳Pauline，八方睇過佢嘅選舉開支，發現Pauline喺區選期間都幾大食，口味仲好地道。
例如喺選舉當日咁忙碌，Pauline晏晝嗰餐點醫肚？原來佢同一位友人去咗主打燒味嘅茶餐廳勁擦，八方發現兩人全程無肉不歡，又燒鵝，又乳豬，但仲未夠喉喎，嚟多個鹹魚蒸肉餅飯同牛柳絲瑞士汁炒河，一人一杯凍奶茶，唔知情嘅真係以為成班建築工人喺度開餐㖭。