區選曲終人散，唔少參選人近日都遞交選舉開支申報，其中喺九龍城又一村狙擊自由黨李梓敬嘅社民連喇沙仔周嘉發，選舉時都落重本，用咗成59,689元，比「富貴黨」李梓敬嘅37,992元，仲多兩萬幾。但使得錢多未必係好事，因為周嘉發嘅開支中，原來有逾千元「貢獻」咗食環署，用嚟移除佢多幅未經許可嘅宣傳品。
今屆被工聯會小花陳穎欣擊敗嘅民協馮檢基，今次區選開支達54,100元，比陳穎欣嘅40,574元多萬幾。而力保不失嘅經民聯梁美芬，則用咗46,900元參選，比對手游蕙禎嘅33,256元多逾一萬，當中1,380元係用喺發出工聯會嘅400封推薦信。