《蘋果日報》開國功臣之一、編輯部總經理李彭基噚日榮休，人稱「基哥」嘅佢，不知不覺喺《蘋果》工作21年，其間又去咗台灣一段日子，幫台蘋打江山，《蘋果》同事噚日幫佢搞咗個party，社長堅哥、副社長張劍虹、總編輯陳沛敏都一齊賀基哥榮休。
基哥臨別贈言，回憶《蘋果》創刊階段喺長沙灣工廈返工，佢當時拎個腐乳樽當水杯用，事關《蘋果》草創時成日炒人，以腐乳樽當水杯，都係俾人炒時方便執嘢，冇諗過一做21年！
基哥話有幸見證《蘋果》由傳統媒體轉型到手機媒體，佢知道呢個係挑戰，但相信《蘋果》員工一定可以克服，基哥仲袋錢入一班後輩袋，話知道不同部門都有佢哋原則，有時難免有所堅持，但亦要互相體諒同理解㗎！