陳奕迅（Eason）一連兩場「Another Eason' Life」澳門站巡唱前晚開騷，老婆徐濠縈、囡囡康堤和爸爸陳裘大拉隊捧場，十分溫馨。阿徐還拍片放社交網，見到Eason演繹《沙龍》時，台上播出他漸變老的樣子。而前日是百變天后梅艷芳的忌辰，身為95年新秀冠軍的Eason，安哥時特別清唱梅姐《心債》來悼念。
Eason在台上說：「噚晚過咗12點，諗起一件事，希望借大家3分鐘時間，同我一齊回憶，陪我想念吓呢個人。」接着Eason在暗淡燈光下清唱《心債》，唱完後他向天上飛吻，場面感人。完騷後他說：「2003年12月30日，我喺醫院一齊送佢走。今日係一個咁特別紀念日，所以我諗不如唱隻歌懷念吓，自己都掛住佢。」
問為甚麼選唱《心債》？Eason說：「呢首歌唔單止令我對梅姐有回憶，仲有好多我嘅童年回憶，細個一個人喺屋企睇《香城浪子》。唱完《心債》跟rundown唱《明年今日》，當我唱到『人總需要勇敢生存，我還是重新許願』時，更加感受到人真係要接受哀傷，先可以向前。」
願望助自閉青年
問到新年願望，Eason說：「最緊要健康，人大咗對物慾要求越來越低，我個電話mon裂咗都未換，去年買咗間屋已經好滿意好滿足，令到我根本唔想出街。做咗咁多年，係時候做想做嘅嘢，希望出自己全創作唱片，仲想做吓善事，或者免費去深水埗唱歌、接觸自閉青年，令佢哋有信心重投社會。」
撰文：皓騫
