新年伊始，又係風水命理師預測運程趨吉避凶搵錢出書嘅大日子。湊湊趣，作為娛圈一分子，就齊齊嚟一次大膽假設，精心預測，2016最有可能發生的十件娛圈大事：曉明日日嗌住Baby當然想要個真Baby，肯肯定今年佢哋兩個都會全力造人；霆鋒王菲成日傳結婚，正所謂空穴來風，有朝一日成事都話唔埋；王維基個電視夢碎咗之後，已經全力起個影視城，變身電影大亨可能只差一步（或者一部好戲）；2015年最多人講嘅坤哥當然有份，捱五年先至出碟可能等多半年就開個唱都唔定。全部預測有根有據，若然到時真係發生咗，唔使畀Like，只要記住引番呢篇文就得啦！
撰文：李曉德
註：成真指數以100%為最大
曉B造人誕真Baby
黃曉明同楊穎（Angelababy）相愛六年，終於認定對方係自己人生另一半，去年5月領證並於10月搞埋童話式婚禮，執手同行共度下半生。佢哋結婚時，曉明媽咪已經開到口想要龍鳳孫，一向侍母至孝嘅曉明自然會快馬加鞭開工造人。雖然呢對夫妻經常各有各搵食難得合體，不過大家都有良好基因，今年內造人成功絕對冇難度，隨時快過Baby做個臉部鑑證。
【成真指數：90%】
鋒菲團圓拉埋天窗
現年34歲嘅謝霆鋒與45歲嘅王菲情路兜兜轉轉十四年，於前年世紀復合，喺北京香閨困獸鬥式共對四日，上演私房菜鋒味由廚房纏綿到客廳，令唔少佢哋嘅忠實粉絲都感受到二人嘅幸福。兩位曾經滄海嘅昔日情侶，之前就有傳佢哋會去大理結婚，但都係得個講字。之不過咁，霆鋒今年好有希望會開演唱會，好事成雙呢啲老土招，催催佢同王菲結婚都唔過份吖。
【成真指數：80%】
Oppa金秀賢當兵去
金秀賢憑韓劇《來自星星的你》，瘋魔萬千女士紅遍整個東南亞。劇中係外星人都敏俊，但現實中卻係尚未當兵嘅韓國男子漢，根據南韓法例要趕喺30歲前入伍服兵役，今年2月就滿28歲嘅金秀賢，極有可能喺今年履行公民責任當兵。到時都教授就要鏟個陸軍裝，扛起槍守疆衞土，肯定傷盡唔少戲迷嘅心。到時板門店或者邊境，極可能多咗fans出現，尋找來自星星的他嘅蹤影。
【成真指數：85%】
維基變身影壇大亨
王維基因為「一男子」同「土地問題」，而未能進軍電視圈，喺乾燒銀紙嘅情況下打退堂鼓。不過有「魔童」之稱嘅王維基出名百厭，就此認輸？No Way！拍劇不如拍戲，港視已經動土起影視城，買埋咁多高清攝影機唔拍戲唔通留嚟當相機咩！魔童據講仲有幾十個劇本喺手，唔好話拍《選戰》電影版，話唔定拍套維基《娛圈血淚史》仲有睇頭，隨時因禍得福成為新一代影壇大亨。
【成真指數：75%】
起霧坤哥殺上紅館
「毒男」吳業坤去年大豐收，被投閒置散五年後成功上位，更勇奪去年大台嘅新人獎金獎，又多次同女神龔嘉欣一齊「吃好西」。照此走勢坤哥憑其極高點擊率，極有機會爭取今年喺紅館開演唱會。想當年側田都係得一隻碟已經開騷，坤哥喺YouTube點止唱咗三十首歌呀，邊有話唔夠歌㗎！想睇佢重演淚水化作蒸氣，眼鏡朦透一幕喺紅館高歌嘅，就齊齊集氣啦！
【成真指數：50%】
大台狂Loop「典解嘅」
自從TVB嘅阿哥、阿姐級人馬，好似林峯、吳卓羲、胡杏兒、陳法拉同徐子珊都相繼離開，唔少從前二線尾嘅藝人都夾硬上咗一線。一台獨大呀嘛，播乜都要睇㗎啦！重金續約嘅凡事問「典解嘅」、樣樣讚「好犀利呀」嘅吳若希，必定拍劇、遊戲、歌唱乜節目都有佢份，踢走埋經過那些年嘅汪阿姐搞個《點解嘅靚聲王》，拎埋全年最佳節目㖭呀。
【成真指數：40%】
亞視吊命長做長有
亞視牌照喺今年4月1日就到期，連招牌人物葉家寶都走埋，大家可能覺得亞視真係玩完，準備定有請小鳳姐。不過世界有無限可能，政府大有可能以「話明4月1日，咁都唔知係愚人節玩笑」嚟過骨，又話唔定TVB走晒啲小生花旦之後，會學似亞視咁無限loop舊劇同內地劇，幫亞視借屍還魂呢。
【成真指數：15%】
Eason祖兒不再攞獎
2016年音樂頒獎禮得一個字「勁悶」，大贏家又離不開容祖兒、陳奕迅（Eason）同埋張敬軒、謝安琪（Kay）。無敵幾時都係最寂寞，軒仔同阿Kay就話仲想爭多幾年，祖兒同Eason仲邊度想同班細路鬥，急流最好可以勇退，天王、天后級嘅Eason同祖兒都會選擇喺今年決定唔再攞獎，顯露超然嘅地位。
【成真指數：65%】
子丹上星戰耍詠春
甄子丹嘅《葉問3》喺聖誕大戰《星球大戰：原力覺醒》，而宇宙最強嘅子丹亦真係打到去宇宙，佢同內地影帝姜文合作拍攝《星戰》外傳，暫定今年年底聖誕檔期上映。子丹嗰手詠春隨時殺出血路，打十個白兵都唔係問題。
【成真指數：30%】
小生復合再去旅行
去年8月一巴震動娛樂圈！79歲嘅謝賢喺記者面前施展橫掃千軍，一巴打向曾江，同時誤中年紀更大83歲嘅胡楓。不過年尾曾江突然道歉，似乎世事又有轉機，話唔定大台利誘之下搞過《4個小生去學武》或者《4個小生去少林》畀大家睇吓更精采嘅謝賢掌風。
【成真指數：20%】
