昨日是百變天后梅艷芳的12周年忌辰，過往大家到九龍塘省善真堂和大嶼山寶蓮寺拜祭，但梅姐的骨灰其實安放在海會塔，梅艷芳歌迷會幾經辛苦才尋獲，梅姐的龕位化名「珠女」。
歌迷會會長蘇小姐昨接受電話訪問，她認為是梅姐在天之靈，歌迷會才能找到骨灰位：「梅媽初初話整好叫我哋去，之後通知我哋大佛蓮位，但嗰度唔係擺骨灰，成班歌迷個心掛住，點都要搵到。梅姐走咗第二年，歌迷上寶蓮寺拜祭，多口問工作人員，佢好好心話：『你嚟拜梅姐，骨灰唔係擺呢度，喺海會塔，噚日先上位。』」
梅媽：珠女係佢乳名
跟了梅姐多年的蘇小姐感嘆說：「我哋唔知梅姐龕位號碼，搵名唔見梅艷芳，第二日再去，搵勻晒都唔見，最後發現擺最頂層孖位，龕位名寫『珠女』，我哋覺得呢個係佢，初時見到龕位喊晒，因為好荒蕪冇乜人打理，我哋幫手清潔，仲撞過梅姐大哥啟明、何韻詩嚟拜祭。」
記者昨向梅媽求證，梅姐骨灰是否安放在海會塔？她說：「係呀，省善、大佛、骨灰龕全部我搞，珠女係佢乳名，佢細個叫阿珠，讀書先叫梅艷芳。點解唔用真名，因為骨灰係我爭番嚟，唔想俾人搞嘢。」梅媽還表示梅姐生忌日期沒錯，舊曆是8月。
昨日忌辰，大批歌迷到省善真堂、寶蓮寺和海會塔拜祭，靈位前擺滿鮮花、點心、紙紮品等，歌迷李小姐和葉小姐說：「每逢10月同12月嚟探阿梅，祭品都係佢生前鍾意食，仲會燒佢鍾意嘅紙紮衫同手袋。」晚上則假中環舉行悼念活動。另徒弟何韻詩和譚耀文昨亦有在fb留言悼念師傅。
採訪：馬建華、譚倩宜、盧妹
攝影：陳俊強、陳慧安
