這天排位朝晨課,最積極的練馬師,毫無疑問是姚本輝。清晨時份天氣寒冷,大部份廐主都留在烽火台睇馬便算,但姚本輝卻在室外四圍走,穿梭馬場不同地方,監督旗下戰馬的操練情況,好似喺機坪睇「包裝奔馳」、「迫擊炮」,又到馬房閘口,等「踏雪無痕」、「崇山寶」操完返嚟,觀察啲馬嘅神態,成朝都忙個不停。
姚本輝咁認真,當然冇死錯人啦。元旦沙田賽事佢出馬九匹之多,大部份具有實力,擺明一早部署好今戰大搏殺,加上今朝的動態,可謂盡露手影。
各駒中,角逐華商會挑戰盃的「包裝奔馳」有幾勁毋須多講。而出戰第四場四班1400米之「踏雪無痕」亦是頭馬希望所在。上仗配黎海榮喺同程得亞軍,只輸頸位畀「揮闖」,拼後榮仔好畀心機操練,本周一親試草地之後,今朝連內圈踱步亦不假手於人,而操之前佢同姚本輝喺機坪摸黑傾咗好耐,睇嚟佢哋兩個都對「踏雪無痕」今戰充滿期待,唔使問一定砌盡,力求為隻馬補中。