【文化籽：籽談風月】
男仔儲figure有乜咁奇，由12吋着衫公仔到Hot Toys，幾貴都有市場。不過呢十年最多人儲嘅，反而係行內俗稱「PVC」嘅不可動人偶，玩具收藏家周朗嘉（Rodney），「後宮佳麗」豈止過千，大條道理儲性感figure：「我欣賞套動畫先儲figure，閒時拎上手係回味劇情同背後訊息，根本唔使介意人哋點睇。」
其實figure已經發展到好多門派，上至1:1公仔、下至幾cm扭蛋景品，都可泛稱為figure。不過睇番宅男熱門蒲點，由旺角信和、皆旺甚至現時點，都有大量唔郁得嘅公仔售賣，呢類簡稱為PCV公仔嘅擺設，價錢相宜、形態優美，塗色精緻兼且小巧易收藏，已經係平民宅男恩物，最重要係八成以上嘅figure，或明或暗都喺度賣弄性感pose，露點露底，某些甚至連女性器官都描繪埋，相當過火，宅男們行一轉信和皆旺，必定睇到臉都紅晒。
PVC即聚氯乙烯，係塑料嘅一種，呢類動漫figure多數用呢種物料製作，所以坊間一概統稱為PVC。從事玩具行業嘅周朗嘉，絕對係玩具達人，超合金、模型、figure樣樣儲，由千幾蚊一隻嘅Hot Toys Iron Man、到成萬蚊一隻嘅B女，都收藏咗幾十隻，仲要儲齊普通版同限定版，唔使借埋腳趾嚟數，都知佢花費過百萬落玩具度，多到要租倉擺。不過講到最受寵幸嘅，都係擺喺屋企嗰千幾隻女性為主嘅figure，雖然龍叔叔訪問前有晒心理準備，但一上到周朗嘉屋企，始終被嚇一跳：房間擺滿一箱箱玩具，睡床轉移出廳，但大廳情況同樣嚴重，牆壁幾乎被玩具盒淹沒，過千隻不同比例figure以U字形圍住大廳中間張床，成間屋只剩低唔夠兩呎嘅「小走廊」，堂堂一個屋苑靚單位，已淪為玩具倉。
坐喺床上「皇帝位」，真係好似有過千「後宮佳麗」望住自己咁，全部都係瓜子口臉兼玲瓏浮凸，當中不乏性感衣着姿勢挑逗嘅少女figure，龍叔叔手忙腳亂，都唔知拎邊隻嚟欣賞好，對女人同玩具有興趣嘅，肯定有種幸福感覺包圍自己。
「其實我係動漫迷多過figure迷，睇動畫其實同荷李活大電影一樣，有好多大道理學習，好似《新世紀福音戰士》，背後帶出嘅意義同訊息，真係值得人反思。每次睇完一齣好嘅作品，意猶未盡，總想有啲實質嘢喺手，當係紀念自己睇過，又或者得閒可以拎上手，回味一下、沉思一下，而數量龐大、佔位唔多嘅PCV，就係最佳選擇。」
動畫落味精 PVC挑戰尺度
「日本動畫一向有性感甚至露底之類嘅調味料，不過以前只會出現喺18禁作品，即18歲以上先可閱讀，不過去到2007、2008年開始氾濫，狂露底已係指定動作，𠵱家更去到無厘頭都會脫衣同爆衫，最經典嘅有《一騎當千》同《天上天下》，所以動畫界有所謂嘅『後宮番』同『肉番』，顧名思義，都係指呢類男主角有大量女朋友，或包含賣弄色情元素嘅作品。最慘係PVC公仔會跟住呢啲動畫，推出大量極少布嘅商品，𠵱家已經去到一個連我都討厭嘅地步，更難怪唔睇動畫嘅人，普遍都戴有色眼鏡睇我呢類figure收藏家。動畫同PVC一脈相承，不可分割，商家狂落『味精』，只會吸引另有意圖嘅動畫迷，真正fans又被迫跟住走，或者漸漸放棄，其實係好可悲嘅困局。」
這些機會：女友學睇動畫接受figure
儲figure，錢當然重要，不過真正收藏家，仲會親自去日本掃貨同上網bid，周朗嘉從事玩具行業，當然有近水樓台嘅優勢。「的確好多限量版都唔難搵到，但仲有好多冷門心頭好，要上網搵二手貨。不過bid二手貨令我有慘痛回憶，幾年前收到一盒心頭好，喺舖頭見到有部分辨銀紙真偽嘅紫外燈機，手痕攞嚟照吓個figure，點知顯示到一撻撻不知名污迹，追問番賣家，佢話自己整親手滴咗啲血落去喎！查實要特定藥劑先照到血液迹，賣家擺明講大話，到底呢啲係咩液體嚟？口水定……希望只係賣家手汗大啦，都唔敢再諗落去。」
千幾隻figure每日圍住自己，係幾有滿足感，不過未來始終要識女仔拍拖結婚㗎？「其實我有女朋友，拍咗幾個月拖，起初我畀收藏品相片佢睇時，佢都嚇一跳，不過我慢慢解釋，每隻PVC都係呈現動畫入面嘅其中一幕，背後有意思，女朋友亦好有耐性咁去睇番套動畫，對唔同角色有咗了解，慢慢就接受喇。」嘩，有錢狂掃自己鍾意嘅玩具，已經係一種福氣，仲要另一半都肯接受，簡直係一眾「FF拎」幾生修到嘅終極幻想。
撰文：龍叔叔
編輯：潘志恆
編輯：李寶筠
美術：楊永昌