41歲的楊千嬅由烈女變烈媽，今年入行20周年的2015，開盡turbo，一年內開演唱會、連拍兩部溫情電影、上真人騷考體能，年底更衝刺出大碟。高低起伏，其間試過連環高燒十日入院、連牛都撞埋，絕對精采過坐過山車。「2015真係過咗400日咁快，好驚！好驚！」2016年，她又準備轉回阿媽、太太模式，「最大希望係阿仔Torres考到間好學校！」補充一句，囝囝其實只是升幼稚園K2㗎咋！
撰文：林妙萍
攝影：周樂恒
造型：顏英儀
髮型：Vic Kwan@ii Hair & Nail
化妝：Ling Chan@ZING the makeup school
楊千嬅2009年和丁子高結婚，2012年生了囝囝丁進諾（Torres），結婚生仔大事一一完。今年變回歌手搏殺期的楊千嬅，巡唱、電影樣樣齊，一刻無停過。
極快400天
回望2015，千嬅連環講了五六次「好快」，「好快，好快，真係好驚！發生咗好多事，多到我都唔記得，又有啲發生咗好耐，又有啲好似噚日發生咁，好似唔止過咗365日嘅光景，而係過咗400日咁快！」
當中，事隔四年出新唱片《如果大家都擁有海》，大碟內有一首陳奕迅作曲、林夕填詞的新歌《剛剛好》，剛好形容這一年，「好好彩，有機會拍咗兩部好有意思嘅電影，做咗一個自己都好滿意嘅演唱會，做埋tour，再參加了從來無試過嘅真人騷、未試過嘅卡通片配音，一月開演唱會，十二月出唱片，功德圓滿了。」其實由生完仔，到重新上台，千嬅也用了一年半載去boost up自己，「去到做演唱會個狀態呀、心情呀、去番個表演者個度，成個人要run in成副偈先可以上台，唔同之前做商演，唱三首歌咁簡單。加上又想做好啲，暗盤又『20周年酬賓誌慶』咁啦。」
被牛撞發高燒
年度難忘之作，除了高燒十日入院，更有為期四個月的內地真人騷《極速前進》，節目考體能、意志、力量，「當你見到隻牛衝埋嚟，撞埋你嗰陣，我真係以為自己死咗，大吉利是！好彩肥肥地卸咗度力咋，但係好驚好驚！」
「日日響度喊！我哋拍開嘢嘅，都係一個節目箒，但我老公係好認真去玩。」認真到夜晚會訓話，更令她發狂是老公有前無後，拼死去玩，「潛水啦，人哋叫佢試下先，有教練陪住試，佢話，『得啦』噗一聲，就跳咗落去，做完上番嚟，跟住我已經癲咗，狂喊！」這個體驗令她認識了一個從未見過的丁子高，「都反映咗我哋幾唔同嘅性格。我老公係一個好有意志、目標堅定嘅人，見到佢好叻、好勇敢嘅一面；我呢，反而平時好巴閉，好strong，好硬淨嗰類，但其實好驚！」
2016追多個
腦海曾經閃過死亡，令她深刻體會要量力而為，極速完，今年決定放慢步伐。「2016新目標，繼續做過好媽媽，家庭第一！希望搵到間好小學，K2已經開始要報呢啲嘢。」即將42歲的千嬅仍想再追一個子女，「我有呢個諗法，但主要係為咗個仔。」生多個，希望Torres學會開心分享、學懂做哥哥的責任，「咁如果無，都OK，呢個係個天嘅命數，好難強求。」新一年期望電影上，可以有更多層次的千嬅被發掘，再試出國語碟。
全職丁太、丁媽媽
過完工作年，千嬅2016一開波先放三個月假唞唞，「呢三個月，想做番全職媽咪嘅角色，同埋全職太太嘅角色，因為totally忽略咗好多，我要pick up番。」自認緊張媽咪，想急速追回一些進度，如：陪老公、消化囝囝功課、聆聽囝囝感受，一家人感受普通生活，去超市、行地質公園等。「上次秋季旅行去大埔，我係咁塞嘢入個仔背包度，全程巴士佢開心到不停講嘢，又一齊整麵包，好簡單又好開心。」
平日由楊媽媽湊Torres，千嬅堅持每朝7點起身送返學，無強求囝囝學習能力，只想他開心、感受愛與認同。「玩呢，佢就黐嗲哋，嗲哋會帶佢去玩癲嘢；媽咪呢，就正嘢嚟㗎，衣食住行，可以滿足佢十個願望。」千嬅更感激學校體諒，無因她職業投訴。
更多精采時尚內容，盡在 http://add.appledaily.com 。