【全港學界排球精英賽】全港學界排球精英賽係每年嘅最後一個學界壓軸賽事，噚日喺青衣體育館舉行嘅四強，重頭戲就當然落喺男子組嘅兩場賽事啦！衞冕嘅長沙灣天主教英文中學喺上屆決賽嘅翻版戰，直落兩局輕取東華三院盧幹庭紀念中學，今日決賽會大鬥以2:1險勝男拔萃嘅筲箕灣官立中學。
男子組打頭陣有衞冕嘅長天大戰上屆亞軍盧幹庭，長天開局就先嚟個下馬威，一直領先到16:10，搞到盧幹庭要叫第二次暫停，之後盧幹庭雖然即刻連拎六分追平16:16，不過最後都要輸一局20:25。第二局長天繼續乘勝追擊，以25:19輕鬆贏埋第二局，殺入決賽。長天貴為精英賽決賽嘅常客，教練梁熾偉就話球員心態仲未成熟：「第二局佢哋太心急而自亂陣腳，加上俾對方粉絲影響而分心，令到比賽同氣氛都好緊張。」
首次殺入精英賽決賽嘅筲官就喺四強同男拔要激戰三局先分出勝負，兩隊今場打到勢均力敵，分數差距都僵持喺一、兩分之間。筲官憑較好嘅把握力先贏一局25:22；到第二局筲官稍為氣力不繼之下俾男拔追番一局25:18；到第三局筲官一開始已經將比分拉開，最後贏埋15:12，今日再面對學界D1決賽對手長天。
鄭裕彤再鬥體藝料激戰
女子組嘅精英賽常客鄭裕彤有多名港青主力，噚日都以25:15、25:16擊敗培正；今日就要面對以25:20、25:19擊敗聖傑靈嘅體藝，合演上屆決賽翻版！面對拼勁十足嘅體藝，鄭裕彤教練陳紹璣話一啲甜頭都冇：「對方雖然唔算高大，但勝在拼勁好強、防守好穩定，加上我哋少咗防守球員，聽（今）日一定會打得好緊湊。」
