2015年就完，MPF今年表現一如所料，繼續令人想爆粗。根據晨星嘅資料，由今年初起計，截至12月30日為止，全港總數524隻MPF入面，得91隻錄得正回報，佔17.4%。換言之，閣下今年揀中蝕錢或零回報嘅基金，機會率超過八成。
今年回報達雙位數嘅MPF基金只得5隻，即係一隻手已經數得晒；而回報5%或以上嘅基金亦只需兩隻手就數晒，因為得10隻咁大把。最可怕嘅係，67%錄得正回報嘅基金，今年都賺唔夠1%。
今年最威威嗰隻MPF基金係海通韓國基金，回報接近兩成，至於其餘回報有5%或以上嘅MPF基金，有日股、美股同北美股票基金，偏偏就搵唔到中港或大中華股票基金嘅蹤影。
就算係今年表現最好嗰隻MPF港股基金──永明首域強積金香港股票基金，全年回報都係負0.25%。
好多人都話MPF係長線投資，唔應該太着重短線賺蝕，可惜大部份MPF基金嘅長線回報都唔見得標青，分分鐘連通脹都追唔上。
最近三年本港通脹率平均約4%，但呢三年年度化回報有4%或以上嘅基金，佔全港MPF基金總數只得25%。
投資正常都係唔熟唔買，但如果MPF只買自己熟悉嘅中港股票基金同大中華股票基金，反而可能係大忌，因為喺呢個市況之下，你好難估到今年邊個國家嘅股票會跑出，甚至連股票定債券邊樣會表現得靚仔啲，都唔係咁易預測。所以盡量分散供款去唔同地區、唔同類別嘅資產，並且定期根據基金表現調整供款分配比例，反而有機會喺呢個不得不玩嘅遊戲之中力保不失。
El.
本欄逢周二、四、五刊出