曾經係萬人迷嘅十三少韋達，家陣變咗萬人插，自從11月29日勝出「經典帝國」後，已經守齋一個月，剛戰佢騎「勇冠王」、「經典帝國」、「軍勇戰神」三匹熱門馬，更輸到連位置都冇，好多人話韋達急劇退化，而且又錫身，覺得佢已downgrade到與同湯智傑同級。究竟十三少係咪差成咁，真係見仁見智。
大家圍插韋達嘅同時，佢老友亦係冠軍級人馬嘅練馬師葉楚航，其實亦陷於低潮，而且「白果期」更耐，11月8日贏「天才」後，完全冇進賬不特止，成個12月更只得一亞兩季，認真大鑊。
究竟韋達先破悶局，抑或航哥先贏馬呢？如果以馬匹實力計，元旦日第五場四班1600米，航哥嘅「琪麟穎」按理可坐位望贏。上季隻馬得三歲，已經喺同程大勝對手，嗰股後勁真係得人驚，今季踏入四歲更成熟，上場季內初出冇乜狀態，1400米亦嫌短，都追入第四，擺明喺四班好超級。拼後操足成個月先再出，今次重配贏馬拍檔潘頓，回師強項1600米，睇嚟航哥2016年會有個好開始。