【今年我至爆】
財經界今年最爆、最忽然人氣嘅人物，肯定係紀惠集團行政總裁湯文亮。今年2月當樓市大旺時，佢語出驚人，預計細價樓將於3個月內爆煲，搞到人人都談論佢呢個「細價樓爆煲論」，細價樓最終冇喺限期內爆煲，佢仲喺福臨門設宴請朋友食飯㖭。
不過湯文亮都係估早咗啫，樓市今季的確開始出現調整。湯文亮近日預期，細價樓明年都會繼續向下，最少要跌15%至20%，並呼籲準買家勿買當頭跌，暫時租樓，等樓市跌定先至入市。
佢估計，「細價樓起碼跌15%至20%，中價樓會微跌，2,000萬元以上豪宅價平穩，超級豪宅仲會有得升」。佢認為，樓市轉壞與加息冇關，「就算加完息，息口仲好低」，主因係持續有大量一手供應，購買力又大不如前。
之前銀行估價進取，面對樓市氣氛逆轉，銀行估價趨保守，湯文亮形容明年樓市會陷入「新樓借唔足，舊樓賣唔郁」嘅困境，大家留意番喇。