【今年我至潮】
Selfie應該係今年其中一個關鍵字！財爺曾俊華喺今年初出席財政預算案論壇，手執「自拍神棍」跟傳媒玩selfie，然後將相片放上facebook，隨即獲like無數，自此好多人一見到財爺就搵佢selfie，大家都玩得相當高興。
就連87歲嘅「超人」李嘉誠都有玩過selfie。話說超人旗下李嘉誠基金會跟以色列理工學院合辦「科技夾子營」，邀請本港約80名師生與傳媒今年初飛去以色列，參觀當地startup公司，超人專登走去送機，一班學生就爭住同超人玩selfie，有學生畀個手機超人揸住selfie，佢都冇say no。原來超人都好潮好玩得㗎。