文詠珊（Janice Man）去年開始頻頻返內地搵真銀，昨日雖然是她的27歲生日，但亦要在寧波開工度過，為內地劇《九州海上牧雲記》拍攝，她在劇中扮演仙女。據知其「iBank筍盤」男友吳啟楠雖然工作忙碌，但為了𠱁女友開心，專程飛到內地陪她過生日，令JM甜到入心。
「切咗至少10個蛋糕」
壽星女JM昨日接受《蘋果》電話訪問，問她今年生日願望是甚麼？她表示：「一定係自己同屋企人都身體健康，另外就係工作順利啦！」問JM是否準備好當人妻，會否考慮跟男友閃婚？她即嘩一聲說：「一定唔會喇！大家有共識，呢幾年會各自努力做嘢。」有指男友專程到劇組陪她過聖誕及生日，甚至連聖誕樹都準備好，希望她在工作中亦有過節氣氛，超級細心，JM聞言甜到漏笑說：「咁除咗佢（指男友），身邊好多人對我好好，好多朋友知我要返內地開工提早同我慶祝，今年切蛋糕都切咗至少10個，媽咪今次冇嚟，但阿姨就陪我入組，仲親手整咗個生日蛋糕送畀我！」
問JM拍完劇會否跟男友去旅行補祝生日？她透露這個劇要拍到明年4月，暫時未敢計劃放假：「我預計會喺呢度拍到2月，之後會轉景去日本開工，到時唔知有冇幾日假期，不過自己開工嗰時心情會調校咗去做嘢mode，所以都會做嘢行先，shopping就等真係旅行先至盡情。」
採訪：小米
