銀行界人士一講到蛇羹，必定想到恒生銀行（011）每年年尾喺中環總行博愛堂設蛇宴招呼客戶與傳媒，唔講唔知，原來永隆銀行都有蛇宴招呼客戶，噚日仲畀傳媒試一試。
永隆喺中環總行21樓有個飯堂，有私家廚房，平時用作宴客之用，目測全層可以擺放到6至7圍，估計都可以招呼80人。
蛇羹有行氣活血之效，天氣凍時，食啖蛇羹，的確係幾和暖。永隆飯堂出品呢個蛇羹，湯的確係幾好飲、幾香，不過可能係華華食唔慣，總係覺得有些少腥味，下次可能要落多啲檸檬葉、白菊花瓣先至得喇。
呢餐蛇宴亦唔止淨係食蛇羹，其他餸菜如蝦多士、蒸魚都好有水準。其實永隆請人食蛇，都係旨在聯誼，年尾聚一聚都唔錯吖。