愛嘅反面就係恨……曾經講過好愛Lily(何傲兒)嘅周子揚，曾經真心相愛，13啜傲兒BB，日前聲稱唔忍心見到何傲兒面對好大壓力，才大爆分手原因。但事後何傲兒及姐姐何傲芝一齊發聲明指，佢哋從冇問周子揚每月拎廿萬生活費等，周子揚所講嘅全屬捏造、絕無事實根據，更稱將會以法律途徑追究。
周子揚同何傲兒近日是非不絕，昨日更有雜誌指，佢哋分手原因，其實導火線係男方多次劈腿，最終被傲兒BB狠飛。
報道更指，西貢地王之子周子揚係「空心老倌」，指周父地產買賣全屬名下8間公司操作，形容地王爸爸冇幫阿仔月付廿萬維持戀情，而且周子揚出道6年，發展麻麻，收入唔多。咁其實，周子揚接受本報訪問嗰陣，都有講過話何家要求佢月付廿萬嗰陣，都有諗過用借貸方式解決，言下之意未有隱瞞老竇嘅錢唔過佢手嘅事實。