亞視前執董葉家寶前晚約埋蔡國威、袁潔儀、劉錫賢、張家瑩、蔡梓銘等一班亞視藝人食飯，朱慧珊因為氣管炎臨時缺席。家寶講到近況話：「梗係開心啦！無官一身輕，我都有幾年冇放假，成個人都好輕鬆，我好享受自由自在，之前衝得太狠，起碼唞番幾個月，先再投入工作。」佢話下年3月初至正式離開亞視，𠵱家係離職前休假，好唔捨得啲同事，唔能夠同佢哋堅持到最後一刻，希望同事未來會更好。
蔡國威預告明年有騷
家寶仲話踓然有好多人接觸過佢，但暫時冇新工作安排，放完假先算，下個月會去台灣環島遊，同去上海探同學朋友，再去日本、加拿大探親，希望重整心靈。
至於負責約大家食飯嘅威仔就話：「打算一齊請家寶食飯，之前大家好忙又辛苦，家寶又要出庭，大家都好撐佢。」講到𠵱家亞視工作環境，威仔話剛收到通知，計劃農曆年廿九至大年初三（明年2月7至10號）4晚做Live：「1月10號有個公益金百萬行，可能係代表亞視最後一年，不過我就唔係好sure。」
而張家瑩都話剛收到工作通知：「𠵱家好尷尬好煩，因為份約差唔多完，以為完約後好Free，諗住農曆年出埠玩。如果真有呢個job係好，會考慮延長合約，所以要再傾，好彩未book酒店同機票。」
撰文：關仁