平日甚少入廚嘅立法會九東議員謝偉俊，噚日出席工展會舉行嘅「齊惜福」活動，同名廚陳光表演用餸頭餸尾煮餸（圖），菜式包括「溫公南乳翡翠齋」、「蛋白欖菜菜粒炒飯」同「薑茸炒芥蘭」。
謝偉俊透露，那些年讀書時期，餐餐自己煮飯，現時工作忙冇時間，想煮都冇得煮。佢批評𠵱家唔少飲宴都好浪費，好多時尾段嘅飯麵都冇人食，認為呢個時代，「酒微菜薄先係先進」，而平時食剩嘅飯，其實用嚟炒飯煲粥都一流，唔好浪費。
「齊惜福」執委黃家和即場品嚐謝偉俊用菜頭菜尾煮嘅芥蘭後，直指謝偉俊「條菜好正」，一啲都唔似係菜頭菜尾，仲話下次要請白姐姐同謝偉俊一齊表演煮餸，謝偉俊當然一口答應，話下次一於同白姐姐嚟個「鴛鴦炒飯」，畀大家過下口癮。