最初扶貧委員會委託周永新團隊研究退休保障之時，左丁山已經對朋友講，社工界人物一定支持全民退保，研究喎，只係如何調整不同方案，用以說服政府及社會大眾嘅啫。扶貧委員會既然出面叫周永新教授做研究，應該已有預設立場嘅啦。
點知竟會搞出個大頭佛，特區政府自製公關大災難，基本上完全推翻周永新團隊嘅退保目標與方案，用數字數據去扑低周永新。政府嘅經濟顧問陳李靄倫屬下有好多經濟分析師，個個係精於經濟分析，精於計量模式嘅經濟系主修生，大都有M. Phil經濟學碩士學位，由佢哋去搞數據，左丁山夠大膽啲講，周永新、黃洪、方敏生等等一班社工碩士、博士幾乎輸實（按：大學裏頭，社工系學生嘅數學水平肯定不及經濟系學生）。
於是問題來了，特區政府嘅扶貧委員會既然搵埋經濟顧問陳李靄倫研究提供人口及稅收數據，以對比周教授對於「公共財政概念及管理，未掌握得好透徹」，點解唔一早打開天窗說亮話，在周教授還在研究階段時，及時提醒佢呀？
呢啲事情，可能涉及競選政治。左丁山以小人之心猜度，當初如果理所當然地委任曾俊華陳家強呢批財經官員研究退休保障，曾陳二人一定唔會只係搵周永新做研究，而係會搵王于漸雷鼎鳴廖柏偉等人，或者係社會、社工、經濟系教授合組研究團隊；只是曾俊華信唔過，可能係潛在競選對手，點可以由佢負責辦理呀，林鄭早無競選鬥志，不是對手，由佢透過扶貧委員會去搞，退保當作扶貧，搞得掂嘅話，林鄭民望高，梁生可以不理，搞彎嘅話，林鄭孭晒亦無傷大雅，佢都準備咗鬆人嘅啦，代梁生孭鑊，當捱義氣啫。現在事情發展就是如此，梁生之特區政府（佢上京述職講過：my government）原則上唔想搞全民退保（左丁山唔反對呢一樣），但為咗交差，都要派吓糖嘅，於是諗出資產上限8萬元呢一招，令全港有資格月領3230元嘅長者，大輻降低至大約為25萬人，特區政府認為可以負擔得起，如要加稅，增幅少過一個百分點，市民料可接受。大計已定，恐怕周永新等人不忿而糾集反對聲音，林鄭就先發制人，唱衰周永新，可謂用心良苦，難怪周教授發覺自己俾政府當咗係儍瓜！