上季本港最佳短途馬，一季內於三地勝出三項國際一級賽的「友瑩格」，這天傷後復出，參試沙田第五組1050米泥閘，在潘頓胯下早段跟放，末段輕鬆透出，以一身位小勝一匹四班馬「歡喜」，季軍是「享耆成」。「友瑩格」的走勢雖未至譽滿欄邊，但明顯目前健康、狀態俱不差。
蘇保羅馬房的「友瑩格」評125分，是目前全港第六高分馬，上仗10月25日出戰1200米二級賽精英碗，因心律不正常及氣管多血大敗，因而錯過衛冕國際賽，不過此駒其實已復操個多月，健康問題的影響，應該比想像中細。
今朝試閘後，馬主楊毅亦話對「格格」的走勢感到滿意，指牠目前勇況正不斷提升中，但始終同最高水準有些距離，亦相信佢仲有鬥心，會繼續監察佢嘅心臟情況。
至於潘頓亦話「格格」試閘表現已算理想，短期內會試多一次閘，才出爭1月31日1200米一級賽百週年紀念短途盃。