【男潮籽：2015大事件】
來到年尾，循例也要回顧一下年度大事，今年波鞋界就有不少經典時刻及靚鞋值得回味。Kobe宣佈退休、Jordan旋風訪港等要事當然精采，說到最為矚目，四位波鞋達人卻不約而同首選“Yeezy”！不但炒至離地天價，老翻更多得路人皆「着」，可見它的王者地位有多誇張！
雙雄力谷adidas盛世
如果你以潮人自居，說到年度大事，沒理由忽略了潮界霸主Kanye West與adidas合作的Yeezy系列，「特別係350，起初齋睇相，好多人笑佢抄款，但出街嗰日全世界都去排隊，就連同日推出嘅AJ MTM都俾佢比落去。」Brian及Anthony如是說。Brian續道：「講真以adidas嘅往迹嚟睇，係唔會限量出鞋，加上Kanye都講過，轉會之後人人都可以買到佢嘅鞋，供應多自然難炒，點知結果係超限量，750更加一早炒到五位數。」不得不提的是，Yeezy 350更在29th Annual Footwear News Achievement Awards中獲得“Shoes of The Year”，鞋王之位當之無愧。
除了Yeezy，年頭發表的Ultra Boost，後勁亦相當凌厲。同樣是由Kanye捧起，其舒適度是最大賣點，William大讚道：「Ultra Boost算係當今最舒服嘅運動鞋，仲將adidas帶到另一個層次。」年尾推出的Hypebeast十周年版更是一鞋難求，「可能有啲情意結，我嗰代都係睇Hypebeast大，加上非常限量，我估只有一千對左右。」這對鞋由年頭紅到年尾，可謂帶起了整個品牌。
Jordan炒風回落 聯乘接力撐起
適逢AJ三十周年，復刻鞋款可謂出個不停，「今年AJ差唔多隔個星期就有一對，而且貨量比之前多，對鞋迷嚟講當然係好事，但無疑會令炒風降溫。」波鞋網站KICKZ-LAB的兩位負責人說。Brian接着說：「以年尾嘅AJ 11 72-10為例，雖然靚但貨多，炒價明顯比之前嘅11差。」雖然聲勢回落，但聯乘系列依然冇得輸，自年頭的Just Don，到後半年的OVO、Supreme，以及最近的Public School都是熱捧之作，Brian和Anthony說：「雖然呼聲唔及Yeezy，但聯乘嘅AJ都有一定嘅叫座力，比較有趣嘅係Supreme雷聲極大，但炒風比想像中更快轉冷。」熊兄補充：「不過AJ本身當然有好嘢，AJ 13 CP PE嘅配色非常靚，亦都算罕有。仲有AJ 1 OG Chicago，以最原始嘅姿態回歸，AJ迷一定想要。」這對OG推出時已全民熱搶，現在炒至$5,000仍有價有市，媲美上年年尾的AJ 1×Fragment。
Curry帶起UA 期待Kobe退休戰鞋
球鞋是潮流，但始終根在運動，NBA球星的動態自然有極大影響力。Curry（圖）勇奪上季冠軍及MVP後，今季依舊出眾，人氣爆燈的他可說以一己之力帶起了Under Armour，熊兄說：「絕對有明星效應，UA今年嘅業績比往年高三倍，喺香港更係知名度爆升，係Curry嘅功勞。」年頭先有少量Curry 1到港，年尾再有大量齊色Curry 2，令本地球場也多UA鞋影。William接道：「另一大事當然係Kobe宣佈季後退休，令Kobe戰鞋更加受關注，Kobe 11亦有傳會提早推出嚟配合Kobe嘅最後『表演』。」至於年前推出，回顧Kobe經典事迹的八款PRELUDE系列更有望升值。
展望2016：奧運年新科技 自動綁帶鞋正式見街
Brian說：「下年係奧運年，各大品牌習慣趁機推出最強最新嘅運動科技，相信來年嘅比拼會好精彩。」以Nike為例，2008年有Flywire，2012年有Flyknit。Anthony說：「今年年尾，adidas已經公佈咗Futurecraft 3D計劃，以3D打印技術為用家做出最貼腳嘅鞋形，率先推出嘅Superstar雖然只屬引子，但超限量下炒至五位數字，下年正式推出相信會更加矚目。」說到新科技，還有自動綁帶球鞋，William說：「Air Mag 2016再一次以拍賣形式出售，罕有度跟2011年差唔多，炒上六位數都唔出奇。」具相當功能的還有Puma Autodisc，飛人保特已於11月親身示範，見他一按即時收緊鞋身，的確令人期待。新技術湧現下，復古球鞋或會稍稍降溫，「應該會偏向較為修長、簡約嘅跑鞋款，純白或者淺色系都係大熱。」四人異口同聲。
各人年度最愛
競爭法有好有壞 假鞋湧現要小心
剛推行的《公平競爭法》讓一眾鞋店自由定價，William說：「好多人以為有平鞋買係好事，但諗深一層，既然一啲較普通嘅款可以割價，最多劈近一半，但一啲較特別嘅款，亦可以提升價格，所以有利亦有弊。」熊兄則說：「另外我覺得假鞋做得越嚟越真亦係要正視嘅問題，以前睇鞋盒鞋身都有明顯破綻，但今年見到嗰啲越嚟越細緻，有啲甚至只能以皮革嘅光澤嚟分辨。」
場地提供：KIX-FILES
記者：韓繼聰
攝影：徐振國、鄧鴻欣
編輯：陳國棟
美術：孔文彬