每逢年底都係盤點清貨好時機，政圈都一樣，花無百日紅，過氣就要out，現實世界就係咁殘酷，由一班新仔新女上場，以新鮮感開創一番新局面。八方都趁新一年將至，同大家預測明年四大界別人氣王，唔知當中又以邊個最當旺？
「滑鼠娘娘」鄺頌晴
港大今年風波特別多，風波之中依然有港大女生冇被嚇親。俗稱「網絡23條」嘅《版權修訂條例》年尾掀起一場網民抗爭，鍵盤戰士不斷點出條例嘅魔鬼細節，擔大旗嘅其中一位女將鄺頌晴，就喺港大文學院主修哲學同政治及公共行政，只有19歲嘅佢已獲封「滑鼠娘娘」嘅稱號，風頭蓋過2014年佔中期間嘅另一位「娘娘」、港大學生會前會長梁麗幗。明年1月立法會復會續審「網絡23條」，唔知呢位新晉人氣女有乜奇招應對？
泛民大戰將 楊岳橋
明年2月底，立法會新東補選大戰開鑼，傳統泛民陣營群星拱照公民黨大律師、人稱岳少嘅楊岳橋出戰，取代公民黨前黨員湯家驊辭職後嘅空缺。雖則青年新政或者撐本土民主前綫、以及建制派亦派員加入混戰，只要泛民支持者團結一致，相信岳少選情仍然看高一線。岳少除咗口才好，鬼馬主意亦一籮籮，如果成功入到立法會，極有機會成為新一代Soundbite王，扭盡六壬為市民消消氣。
火熱公職王 劉鳴煒
富二三代近年極受特區政府重用，大大小小諮詢委員會都有佢哋身影，但今年冒起最急兼最紅嘅一位，肯定係華置前主席劉鑾雄個仔劉鳴煒，上年開始任海洋公園副主席，今年3月更獲委以重任掌青年事務委員會主席，其間爆出金句叫年輕人少啲去日本以便儲錢買樓，而佢最近更宣佈辭任華置行政總裁，明言放更多時間喺公共事務。嘩，既得CY歡心又肯瞓身，明年肯定係劉鳴煒嘅世界，CY過往嘅御用公職王張震遠等等統統out！
建制女殺手 陳曼琪
當肥嘟嘟嘅李偲嫣返回V面「少女」時代，估唔到就係被out之時。大家有冇發覺李偲嫣好耐冇出動？盛傳有建制派搵佢搞嘅網媒亦胎死腹中；冇成效嘅嘢，搞嚟都多餘，何況江山自有人才出。有建制中人話呀，千祈咪對陳曼琪呢隻黑馬走漏眼，曾經喺旺角佔領區宣讀禁制令嘅佢，退出民建聯以自由身打江山，冇咗包袱，肯定更「有所為」，盛傳佢會出戰立法會法律界，狙擊泛民力度點會河蟹？
兩大黑馬膠出位
馮煒光 瘋芒筆露勁惹火
曾自詡「白宮發言人」嘅新聞統籌專員馮煒光，2015年相當「出位」，先喺年初高調宣佈告別單身生涯，後又喺報章以「金鐘仁」名義寫文鬧自由黨田少但唔認數，反被田少強勢狙擊。
除咗太過「瘋」芒「筆」露，佢亦愛揸機拍人，3月就喺政府新聞處人員在場下，以私伙「土豪金」iPhone拍低梁振英喺行會前收請願信一刻，再將短片傳去梁粉網站《港人講地》，成為官場熱話。
年尾佢繼續勤力拍片，包括喺11月尾，突然喺fb上載一段自己出街時俾人辱罵片段，12月就喺冇申請相關牌照嘅情況下，將梁振英同黃家強合唱嘅《喜歡你》片段上載到特首fb，搞到特首辦事後承認做法不理想「補鑊」，都算年頭紅到年尾咯。
梁繼昌 封存「屎」迹誓翻案
是屎不是屎？係咪好奇妙？會計界立法會議員梁繼昌早前懷疑沾「屎」，令佢人氣急升，但化驗報告卻指疑似糞便只係木材黏合劑「脲甲醛樹脂」。梁回顧呢件歷「屎」，笑笑口話化驗所已將中招衣物畀番佢，佢會封存好兩件名牌衫褲，待未來全新嘅科學鑑證方法面世，再攞去化驗喎。
梁繼昌話事發後一兩星期，啲人見親佢都同佢高調「論糞」，熱潮過咗，社交話題已回復正常。佢至今依然覺得事件十分奇怪，因當日件衫都沾到污物，如果係黏合劑，何解上衫都中招？仍然覺得係一宗懸案。
未來一年，佢話要專注做好由佢提出嘅私人條例草案，以保障為公眾利益而洩密嘅人士，同時專注審議幾條稅務修訂條例，向業界交功課。
李八方
mailto:[email protected]