要講今年一隻好特別嘅新股，錦州銀行（416）一定有份，佢特別在冇乜人like，公開發售部份嘅認購率只得4%，好在保薦人幫到手，呢隻股先至成功喺本月頭掛牌。不過，上市未夠一個月，公司噚日就宣佈，獨立非執董賈玉革辭職不幹了，好似有啲耐人尋味。
錦州銀行話，賈玉革「因其個人原因」，辭任獨董、董事會旗下戰略委員會成員與風險管理委員會主席職務，仲要係上星期三已經生效。
其實錦州銀行本月7日先至掛牌，仲記得董事長張偉喺上市儀式當日好鬼high，話上市係實現咗佢嘅夢想，佢仲要未夠鐘就敲鑼㖭，可以想像到佢呢條上市之路係幾咁艱辛，冇計喇，錦州銀行借咗錢畀漢能集團，中國東北經濟又差，上到市真係要還神。