阿松又出動喇！冇錯，又係前財爺兼特首黑馬梁錦松！下個月21日，阿松將到公開大學為《公大講堂》主講，仲要以目前最令中產人士不滿嘅教育議題做主題，向高難度挑戰，題目係「再思教育」。唔知阿松會唔會食住熱潮「再思TSA」，同現場觀眾講吓佢係咪贊成暫緩TSA？八方相信阿松若然撐取消TSA，莘莘學子以及唔少家長，應該都支持阿松做特首噃。
其實阿松早前已透露，會聯同志同道合人士組班研究教育政策，畢竟佢做過大學教育資助委員會主席及教育統籌委員會主席，一直對教育制度好上心。但唔少中產家長極度唔like嘅母語教學，就係梁錦松積極推動㗎噃，如果阿松真係要選，母語教學隨時係佢嘅惹火議題咯。