《人民日報》海外版噚日同香港埋單，喺文章中以「反、寒、憾、通、轉」五字為香港總結。唔少網民睇完幾氣結，一則覺得香港發展使乜官媒多事？二嚟對官媒嘅分析唔同意，自行演繹番香港人嘅意思。
反 梁班子今年唔少施政引起港人反彈同反感，唔肯取消TSA就係一例，以「反」字總結其實理所當然；但官媒揀呢個字，卻只着眼反水貨客問題。
寒 港大由副校長同校委會主席嘅任命，有網民話令港人越睇越心「寒」；官媒卻只話驅蝗同鳩嗚行動，令香港旅業步入「寒」冬喎。
憾 冇得一人一票選特首，唔少港人對此好遺「憾」；但官媒揀呢個字，卻旨在將責任卸去否決政改嘅民主派，話佢哋鑄成香港民主史上最大「憾」事。
通 新一屆區選結果令大家睇「通」咗，新面孔上場，求變係大勢；官媒嘅「通」卻只重視於金錢效益嘅滬港通。
轉 官媒最後以「轉」字寄語香港參與一帶一路嘅轉型建設；八方都覺得「轉」字好有意思，明年係立法會選舉年，香港政局有冇得大「轉」？就睇大家肯唔肯改變。