政務司司長兼扶貧委員會主席林鄭月娥人稱好打得，上電台平心靜氣解釋諮詢文件之餘，竟然沉不住氣向社工界權威學者周永新開火，其言論對於一個學術界人物係好大侮辱，令不少社工界學者嚇咗一跳，繼而大怒，有二十幾名學者，以中大社會工作系副教授黃洪、港大社會科學院實務教授方敏生（前社聯總幹事）等為首，聲言杯葛扶貧委員會嘅退保諮詢，即係話：「唔再同政府玩」，咁搞法，是否就係特區政府樂意見到嘅呢？
梁振英政府以強硬堅持己見見稱，林鄭侮辱周永新及其研究團隊（未見公佈何許人也，應該大部份係社工學者）唔夠認真之時，梁振英就上京見習李，習近平指示「一國兩制堅定不移，不會變，不動搖，確保一國兩制在香港的實踐不走樣，不變形，始終沿着正確的方向前進」，呢番說話如何解讀，你諗你，我諗就係：「不能讓反對派得逞，寸步不讓，要緊跟中央指示。」退休保障唔會緊要到向習近平批示嘅，但精神上，就係根據政府既定方針辦事，公眾意見啱聽就聽，唔啱聽（如周永新及社工界）就砌佢咁解囉！
12月22日林鄭仲捧周永新上枱，譽之為「社工之父」，都幾骨痺。周永新冇錯係權威教授，但佢只有68歲，在港大讀書之時，港大中大已有社工系，那時候的周永新老師及前輩先至係香港社會工作學之催生者，「社工之父」未輪到周永新啩？稱讚之後，第二日林鄭就將周永新摑一巴掌，女高官之心都幾難捉摸。
論述退休保障立場方面，左丁山屬於經濟佬一派。主張審慎研究，因為數吓手指都知道全民退保會係特區政府一個長期沉重負擔，幾難實行，如果要實施，必須全民辯論香港應否、可否改行高稅制北歐經濟模式，香港應否建立GST（消費稅）來擴大稅基，一講到呢啲嘢，社工界與經濟界必然爭論到面紅耳熱，周永新黃洪嘅講法，一定與王于漸雷鼎鳴有大分別。現時搞到彎晒嘅就係林鄭月娥主導嘅扶貧委員會，做乜鬼一早邀請周永新主持退保研究，而唔係搵經濟學教授？請得社工教授做研究就俾人一個期望，以為政府有誠意推動退保（唔通林鄭天真到以為周永新會反對退保？），但依家又將周永新嘅方案講到一文不值，玩殘周永新及社工界之餘，亦將社會分裂得更厲害，林鄭究竟與梁特有冇默契㗎！