呢個聖誕假期，有邊個政界中人最為大家「津津樂道」？花生友相信，教育局局長吳克儉都係其中一個啩，俾傳媒追訪而要報警求助？明顯係梁班子內「膽小鬼」喎，花生友聽聞，政府內部唔少人發現吳得掂原來係容易受驚的男人，都感到好震驚！
如果真係受到嚴重滋擾、影響生活，有政商界中人都話，梗係要報警；但如果知道對方係記者，而且只係跟車追訪下，呢位政商界人士就話報警係多餘，一則正如林大輝所言，有浪費警力之嫌，二則食得鹹魚抵得渴，傳媒跟吓官員行蹤，有乜咁大不了？除非自己身有屎，否則都唔使太驚喎！
無知無能無膽
其實從呢件事可以引證，吳得掂根本都未投入政府角色，除咗唔肯為公務而犧牲私人時間，竟然連公眾人物對傳媒應有嘅態度都唔識，確實唔得掂。花生友聽聞，有政商界私下封咗吳得掂做「三無」人士，除咗之前已經知道嘅「無知」同「無能」，年尾流流再發現佢係「無膽」，大「讚」梁班子（或者應該係特首梁振英至真）非常有「大愛」精神，對不同人士都咁關愛同照顧有加。
明年1月11日，立法會教育事務委員會又再開會討論TSA，有政商界都觀望緊，吳得掂會唔會出席解畫？嗱，如果佢出席，出事指數會好高；但若然缺席，一定再被狂鬧，即係出唔出席都咁惹火，花生友都祝佢好運咯。
花生友
周二、四刊出