財爺曾俊華周日喺網誌撰文，話本土意識一樣可成為正面、具建設性嘅力量，推動香港變得更好，向來惹火嘅內地官媒《環球時報》唔知係咪想還擊鬍鬚曾？
噚日一篇題為《警惕香港新本土主義》嘅文章，批評「新本土主義」嘅政治目的係要「香港完全自治」。嘩，分裂國家咁大罪名，講求brotherhood嘅鬍鬚曾擔唔擔當得起？
呢篇文章係全國港澳研究會會員樊鵬嘅「作品」，內容話新本土主義被香港自由派傳媒利用並刻意渲染成為主流社會思潮，將公民社會活動、泛民運動、反地產霸權、文化保育運動等，全部冠以「本土主義」，指呢啲媒體旨在尋求社會本土政治嘅認同，嚴重扭曲香港歷史喎。
篇文越講越大，話新本土主義嘅相關書籍同文化活動，不排除有西方勢力支持，仲要提防澳門、台灣、新加坡、馬來西亞嘅華南公民社會，為香港爭取國際支持，甚至話呢股勢力可能會同台灣、東南亞國家拒中抗共，「同時不排除同台獨勢力合流的可能，在國際領域製造意識形態。」對待《環時》，認真你就輸；唔知鬍鬚曾又有乜意見？