關淑怡（Shirley）、胡琴演奏家王憓同顧芮寧，前晚喺文化中心舉行音樂會，穿緊身短裙腰間凸腩嘅Shirley出場唱《繾綣28800BPS》時，支咪時大時細聲，唱咗兩句已經破音。而佢坐低唱《窗內窗外》時，表現都係一般。成晚亦好多牢騷，突然話：「我唔講咁多，我講冇人信，寫就有人信。」冇耐又話：「上台要聲色藝，而我欠一樣係唔夠靚，所以諗住對腳搽油靚啲，但蹺腳時會不停咁跣落嚟，搞到我唱唔到歌。」
同王憓開玩笑
鄧建明（Joey Tang）幫Shirley伴奏《相濡以沫》時，大讚Shirley把聲世上難求，係上天賜嘅禮物，Shirley即自嘲：「唔走音嗰時囉！」到準備唱最後一首歌曲《地盡頭》時，Shirley話多謝王憓老師送咗個二胡畀佢：「你送二胡畀我但冇畀支弓我，返到屋企我個仔問只得兩條線點拉？」搞到身邊嘅王憓尷尬話係一時唔記得咗。
Shirley完騷後接受訪問，話自己當時只係搞吓氣氛：「我係重幽默感，好多笑話，唔好得罪我，我冰島有男友。」有男友係咪堅㗎？Shirley即笑話可以畀個名大家去冰島搵吓。講到唱歌走音，佢話係個耳機問題，除咗耳機就冇事喇！問到囝囝有冇興趣學拉二胡？佢話：「唔講囝囝，不過，如果佢要學就要買耳塞先，有小朋友喺屋企拉二胡同埋小提琴，你會知係乜嘢感受。」
撰文：馮仁昭