行過中上環，唔難發現欄杆上飾有七彩針織，當中許多是手作達人Billie Ng的傑作，水管上的小蘑菇，令人覺得既驚喜又溫暖。相比起傳統的Graffiti，這類針織塗鴉（Yarn Bombing）相對冇咁aggressive，以溫柔方式美化城市，也為日常生活增添樂趣。Yarn Bombing最初在美國流行，後來傳到歐洲，在蘇格蘭小鎮Selkirk，也有一位104歲婆婆用七彩毛冷包圍城市，她更被譽為「可能是當今最年長的街頭藝術家」。婆婆名叫Grace Brett，得閒無事最鍾意玩針織，幫下BB仔織毛衣，又會織下披肩咁，有日婆婆見到玻璃櫥窗的毛線球，覺得好吸引，就忽發奇想幫小鎮織毛衣，現在小鎮裏的電線桿、樹幹、圍欄甚至電話亭的七彩針織，都是Grace與一班婆婆合力創作的作品，將小鎮變成可愛的童話國度。不過Grace最感動人的，是身體力行向年輕人證明，夢想其實無分年齡，104歲都可做到，你還可以有甚麼藉口講做唔到？
資料來源：
http://goo.gl/HAIXTx
記者：劉東佩