拆禮物日和同行老友茶敍，說起來年工作大計，幾乎人人都說第N次下定決心，要認真為公司搞搞網絡宣傳。
對了，都好幾年了，一直說數碼宣傳是大勢所趨，講吓講吓又一年，真正落實行動的企業始終有限。
不過，大概避無可避了，不少本港最大的廣告商如P&G，都大刀闊斧地縮減投放在傳統媒體的廣告預算。同一時間，又有統計數字指出，今年第三季，廣告商放在數碼和流動的宣傳費已分別大幅上升三成和五成，再猶豫不決，也許就過份落後於形勢了。
至於廣告公司的數碼宣傳團隊，就更加不遺餘力奉勸各客戶，2016的大趨勢已經唔係小注小注試試吓，領先巿場的品牌來年肯定在數碼流動推廣重鎚出擊，貴公司唔係仲未開始呀！
又看看美國那邊的數字，有調查顯示，有七成受訪公司表示他們會在來年增加數碼宣傳經費，有近八成公司話已有專人或專屬隊伍處理社交媒體，又有調查話，marketer平均有六成時間是花在digital marketing上。見到咁嘅數據，的確叫人蠢蠢欲動。
但也不是毫無懸念的，一大障礙是高管間精神分裂狀況依然普遍，大把人扮晒「潮」，把口叫你諗諗佢，到真係問佢攞預算，又唔知係咪其實聽極唔明啲後生講乜，而且自己和朋輩冇參與，根本冇feel冇共鳴，始終口爽荷包𣲷。
美國都有啲過癮數據㗎，有五成受訪公司雖然聲稱自己有做數碼宣傳，但卻又話承認自己沒有全盤大計，唔，即係仲係試試吓心態囉。
又有七成營銷大員，對自己能量化流動宣傳回報冇信心，咦，咁咪即係怕同老闆交代唔到？嘻嘻，咁唔係叻過我哋好多啫！
彭瑪莉
mailto:[email protected]