聖誕節通常都係一家大細外出遊玩嘅佳節，自由黨青年團主席李梓敬Dominic，都喺今個聖誕帶住5個月大嘅B仔搞本土遊，見識一下香港呢個大世界，包括去過工展會感受下購物狂潮，以及按傳統去尖東睇燈飾。
囝囝得5個月大，當然唔會落地留下足迹，幾乎次次都係由Dominic孭住佢四圍騰。
有啲爸爸未必想湊仔look曝光，尤其係政商界中人，可能怕形象唔夠硬朗。
但Dominic完全唔介意，不時喺facebook貼出「孭帶爸B」嘅相（圖），非常住家男人。Dominic仲同八方分享湊仔苦樂，話好在囝囝唔夠兩個月就戒咗夜奶，否則佢喺上月區選嗰段時間，真係唔知點算咯。