身兼港區人大代表嘅南旋集團主席王庭聰嘅細女麗盈Teresa，前日同拍拖12年嘅男友Jason結束愛情長跑，喺會展筵開150席同親朋分享喜悅，Teresa講到明相信家庭好快會有新成員，在場來賓個個拍手，支持一對新人積極造人。
除咗新郎哥同新娘子係焦點，在場都有位女仔好吸睛，就係王庭聰嘅孫女、3歲半嘅潼潼嘞。王庭聰喺台上獻唱《愛拼才會贏》娛賓，潼潼萌爆登台陪住爺爺一齊唱；之後王庭聰邀請因為公益金及小母牛等慈善活動而結緣嘅藝員，包括陳百祥、彭健新、陳庭欣等上台大合唱（圖），encore《愛拼才會贏》，潼潼好有台型唔怯場，手舞足蹈冧盡全場，非常有明星相。王庭聰仲即場捐咗100萬畀小母牛，辦喜事兼做善事。