內地「金舖一哥」老鳳祥今年進軍香港，轉眼開到第三間分店，噚日位於旺角彌敦道嘅旗艦店開幕，店內有一條價值超過8,500萬元嘅翡翠鑽石項鏈作為鎮店之寶。
老鳳祥呢間旗艦店樓高3層，佔地超過7,000方呎，比其餘兩間旺角同尖沙嘴分店加埋仲要大。位於1樓VIP區入面，放滿高價產品，其中一條鑲滿鑽石嘅翡翠項鏈最搶眼，十幾粒翡翠，每粒都大過波子，定價超過8,518萬元。
同層亦擺放咗好多手工精細嘅黃金擺設，件件十萬元以上，就好似一條15吋長嘅足金魚，就要超過31萬元（店員未有提供重量），夠晒土豪！呢個VIP區，除咗要成為老鳳祥會員之外，仲要消費滿一定金額先至可以入內，普通顧客唔係咁易見到呢批貨品。
雖然話零售業轉差，但老鳳祥已經計劃未來3至5年，開10至20間分店，如果租金繼續跌，仲會開多幾間，實行要同本地老行尊平起平坐咁話。
