【汽車籽：新車落地】
以往一說起改裝車，大家都會想到性能卓越、飛車常客。如今香港嚴厲打擊非法賽車，加上以影快相等措施來限制行車速度，越來越少車主改裝汽車提升馬力。可是愛車之人豈會就此停步，他們改向外觀落手，加上日本K car（輕自動車）興起，這類變化更多的改裝車得以輸港，例如有外形似足玩具貨櫃車的Suzuki Every。然而，隨着數量漸多，市場出現了渾水摸魚的情況，日本貨竟然不再是質素保證。
這台第五代Suzuki Every，在香港多用作小型工程車，現在卻有不少車主喜歡把它改裝，讓其外觀變得更平易近人。最大特點就是車頭，把原本沉悶的四方造型，改得具貨櫃車或火車頭的感覺。好玩之處是，就連兩顆頭燈的形狀及擺位也有不同！車身塗上米色，配襯白色車頂及裙腳包圍，絲毫不覺突兀，反而加倍可愛討喜。
空間充足 容易上落
自日本引入這台改裝車的曹繼民（民哥），本身從事汽車改裝，特別鍾情體積的骰輕巧的汽車。不過，入口改裝車要通過檢驗再出牌，會否十分困難？「其實唔算容易，事前花咗好多心機同時間去研究呢台車喺日本改裝之後，係咪仍然符合香港法例。例如佢嘅頭燈同Mini一樣，所以能夠過關。」
至於內櫳，沒有經過特別改裝，只是塗上跟車身相應的米色，再以白色襯托。然而，個人認為車櫳本就毋須更動，因為Suzuki Every本身的實用性，便是一個極大賣點。雖然車仔細細，可是內裏空間大得驚人，坐下後，頭頂與車頂之間還有大段距離，即使身形高大的乘客也不必擔心感覺侷促。而且車身較矮容易上落，適合用來接載老人家或小朋友。能把一台普通不過的小型工程車，變成如此玩味十足的汽車，實在不得不佩服日本人的創意。
民哥說如今在日本搜尋具質素的改裝車已越來越難，主因是出現了渾水摸魚的情況，「喺日本，已經有好多質素參差嘅車。點解？因為唔一定係日本人造，但係就喺日本度賣，所以質素冇乜保證。以往你買日本貨，都有一定嘅信心，但𠵱家就唔同晒啦。可能嗰台車喺第二度運去日本，自己買啲零件輕微加工就賣番出去。」
女性玩家漸增 600cc已經夠用
對於改裝汽車，民哥說現在對性能需求已近乎飽和，加上政府全力打擊超速及非法改裝，即使擁有極強馬力，能夠發揮的機會也不多，所以車主轉而追求外觀上的變化。改裝成造型更可愛靈活的日本K car，能助他開拓更多客源，「女性客戶嘅數量一路都好多，佢哋會願意去玩一啲特別啲嘅車，但唔係一定要追求速度，呢個都跟日本一直影響住香港嘅改車文化有關。」
儘管日本K car改裝潛力無限，而且空間實用，但是馬力細小，例如Suzuki Every的排氣量亦只有660cc，讓很多香港車主卻步。民哥則說大家仍有誤解，「因為好多人覺得660cc冇力，其實喺香港嚟講，已經足夠一般應用。如果你係跟足法例規管，660cc真係夠晒，只不過大馬力可以爬頭咁解，就算排氣量再大，喺香港都得物無所用。」
改車經驗豐富的民哥，尤其喜愛向的骰輕巧的汽車落手，曾迷戀改裝俗稱「餓𡃁之Van」的福士經典麵包車，其中一台更花了三年時間來改裝。至於現在哪那一台較有改裝的潛力？民哥說正是Suzuki Every，「最喜歡改裝嘅車，暫時都係以Suzuki Every為主，因為佢嘅變化仲繼續緊，我之後仲有一台改裝得更誇張嘅車。當你揸住一台細車，排氣量又細，但依然受人注目，你自然會好開心。我唔會甘心買一台平凡嘅車，如果你用普通車嘅價錢，可以玩到自己鍾意嘅嘢，我覺得冇乜問題。」
Suzuki Every
引擎：658cc直三
波箱：4速自動波
售價：待定
查詢：9836 1868（Auto Workshop）
記者：梁立勤
攝影：楊錦文
編輯：陳國棟
美術：吳子豪