曼聯呢排水深火熱，職球員自然成為激進球迷嘅開刀對象，上仗不敵史篤城後，領隊雲高爾已經暗示唔使球會出手，佢都會自動走人，認真心淡；英國《每日電訊報》就話，無論周一對車路士嘅戰果贏定輸，雲高爾都會走人，大軍周日晚抵達酒店備戰嗰時，球迷不斷同雲高爾自拍，唔通心知呢位領隊時日無多？
至於今季先加盟嘅翼鋒迪比，喺對史篤城一戰派大膠，搞到球隊先失波最終仲輸埋，呢位荷蘭國腳就更加成為眾矢之的，迪比日前喺個人instagram上載自己同聖誕樹嘅合照，又祝福各位聖誕快樂；輸完波仲大搖大擺咁揸架新勞斯萊斯，勁高調咁去操練。魔迷嬲起上嚟就留言鬧佢，粗口自然不在話下，又鬧佢好學唔學，學尹佩斯玩插水式頭槌，結果插出個禍來，真抵死。