金管局總裁陳德霖曾經講過，上車盤定義係600萬元以下單位。
政府統計處數據顯示，今年第三季本港二人家庭月入中位數只有19,500元，所以唔好講600萬元，就算買一個400萬元單位，月入只達全港中位數嘅家庭，都要不吃不喝差不多七年，先儲夠四成首期上車（700萬元以下單位，銀行最多只提供六成按揭）。樓價同一般市民購買力脫節嘅程度，以及陳總嘅離地程度，可想而知。
撇除首期要儲幾耐嘅問題不談，筆者上周寫到，政府一項反映市民供樓負擔能力嘅指標，顯示本港家庭供樓負擔佔收入64%，反映現時供樓開支同一般市民收入比較，未算太過份。但問題係，要成功拎到銀行按揭同過到壓測，一個月入只達本港入息中位數嘅二人家庭，喺借盡六成按揭而且冇按保之下，就算做盡30年按揭，亦只能夠負擔到樓價約350萬元以下嘅單位。
基於上述原因，筆者認為上車盤嘅界線應在大約350萬元以下先合理，因為當上車盤價錢普遍處於該水平以下，就代表住入息只係處於一般水平嘅市民，都有資格取得銀行按揭並過到銀行壓測，順利上車。
隨住樓價下調，近日350萬元以下放盤已見陸續增加，但筆者覺得樓價需要再跌，直至350萬元以下放盤處處，亦即上車客輕易搵到盤嘅程度，樓市累積嘅需求先會得以大量釋放。否則，喺買家數目有限嘅情況下，樓市賣盤將缺乏承接，令樓價下調過程難以劃上句號。
有人可能會話，月入唔夠兩萬元，只相當於全港中位數，就唔好學人買樓，亦有人會覺得呢個收入唔應諗私樓，只應考慮居屋或自由市場公屋。
不過筆者嘅重點並非搵幾多錢先有資格買樓，亦唔係想講買樓係咪必須，而係想探討究竟樓價要跌到乜嘢水平，一般市民先有資格上車，所以先會選擇以月入只達入息中位數嘅二人家庭，作為推算樓價合理水平嘅基礎。
最後，新一年將至，筆者嘅新年願望係，以後再冇香港人需要居住於狀況惡劣又貴租嘅劏房。
El.
本欄逢周二、四、五刊出