韓國男團Super Junior-K.R.Y.前晚於亞博館開騷，厲旭用普通話唱完蕭敬騰的《原諒我》後，再向本地歌手側田挑機，用廣東話唱出《命硬》，驚喜程度跟其同鄉女歌手IU之前來港唱《囍帖街》有得揮，而厲旭亦算發音標準，贏得全場跟着大合唱。黃偉文（阿Y）對於再有填詞作品被韓星睇中，他在Instagram留言多謝：「又一首我心愛的作品被誠意地重唱了。」
圭賢亦不執輸，以普通話演唱林俊傑的《她說》。尾聲時，厲旭拿出貓紙講廣東話講足3分鐘，他指在香港有很多美好回憶，又說：「今次同圭賢、藝聲呀一齊嚟，雖然只開一場係有啲可惜，真係想喺度休息幾日，但因為我係superstar，所以要快啲返韓國，香港嘅粉絲唔好唔記得我呀，要健康。」雖然夾雜泰文腔很搞笑，但誠意搭夠。
此外，厲旭因缺席前晚首爾的《KBS演藝大賞》，故由SJ隊友利特代他領取DJ獎，利特更透露厲旭明年會當兵。
採訪：梁婉霞
攝影：仇志德
