雖然新界東補選仲有一排先報名，但好多有心人已落區宣傳，好似公民黨楊岳橋上星期六去咗沙田第一城企街站，仲派宣傳品《港紙》，不過佢醒目，邊派邊講份嘢唔值錢，可以拎去「攝煲底」，好明顯就怕俾人捉佢違規派禮物！
但另一個有心人方國珊，就俾人捉到佢喺星期六派年曆（圖），疑似違規！
八方問問方國珊有乜回應，佢解釋係有收集市民提名參加補選，但同派年曆係分開做，而且個年曆只係表面，其實真正「身份」係一份工作報告，仲話自己作為一個區議員，過去8年一直都係咁做，加上已經一早印好，如果年尾唔派畀街坊就會過時喇，又補充話至今未報名，唔認為有踩界，強調剛選完區議會點會唔知規矩喎！