越嚟越少人喺節日親手寫心意卡，大部份朋友都只係用WhatsApp或者電郵講句聖誕快樂就算，不過近日小米就大玩傳統，打算一共寄出10萬張親手寫嘅新年明信片畀支持小米嘅「米粉」，等佢哋開開心心迎接2016年，即係話要旗下約8,000名員工齊齊「罰抄」，平均每人要寫10至15張，搞到一班打工仔聖誕節要罰抄。
為咗鼓勵旗下員工響應活動，主席雷軍平安夜當日以身作則，親手寫咗10張明信片寄去畀米粉，又向員工提供咗15個樣本畀大家「抄考」。老闆出馬，威力當然大，全體員工隨後紛紛喺微信、微博貼上自己罰抄嘅功課，就連巴西籍嘅小米副總裁Hugo Barra都用中文寫明信片，仲貼喺facebook，間接話畀雷軍知，自己都有份交功課㗎。