一隻IPO要熱炒，概念係好緊要。內地最近有一間公司申請「新三板」上市，不但係「國際銀行股」，仲要有「互聯網+」概念！咩銀行咁巴閉？就係「冥通銀行」！
冇呃你，申請上市嘅公司係廣東翊翔民俗文化，主要生產冥幣賣去香港、新加坡及馬來西亞。唔好以為呢間「印鈔公司」收入少，單係今年首三季，係咁印「銀紙」，就印出近4,000萬元（係人民幣，唔係冥幣）收入。公司仲話要利用互聯網推廣民俗文化禮儀，咁佢無啦啦就多重「互聯網+」概念。
有新公司上市，當然要問股評人有冇得炒。君陽證券CEO鄧聲興就突破盲點：「講到尾呢間都係印刷公司啫！」不過佢話，內地人當「新三板」賭場，呢隻股炒係有得炒，但兩日貨仔囉。