年度又到，年年都搞年度乜乜乜，搞到濫，遲早年度兩個字，會比前度fusion粗口，來得更難聽！
本年度至紅的，黐！
黐根，黐總掣，黐晒線！現實是：根黐冇藥醫，人叻無得救！一人做事一根當，黨有一條根黐咗，樹木辦都說了，爛根喎，唔移除，死人喎，無得留低。一根黐，全黨跟住黐，精神科醫生點敢睇症，這些民字頭黐孖根，呼出的熱氣都會惹人精神分裂啊主席！
黐，還有動用高層次些少那條筋的。排排坐黐住習總，滿以為陪笑就可以黐到個靚位。同志們，喔不，同事們，識做的吧。黐出面，到頭來，黐到一面屁。想平起平坐嗎？平平聲，抽習總大寶號的水，有好下場才奇。
官到無求線自黐，這條線，比根幼，黐起來，就是禮賓府那位花農的超級聯繫戰線。千里官場一線黐，香港高官鍾意任食日本放題，鍾意睇日本靚正紅葉，鍾意用身體語言溝穿校服的日本妹。高官個老細卻黐住強國土豪，一路向西，泊京爺碼頭。兩條路線，會追撞，抑或最終黐埋一條？問吓林鄭，天堂個筍位，黐得實唔實呢？